मेंदूला सकारात्मकतेची सवय लावण्यासाठी हे करा.*_

 आपल्या मनाला आणि मेंदूला सकारात्मकतेची सवय लावण्यासाठी हे करा.

👉 आपले आरोग्य हे जितके शारीरिक घटकांवर अवलंबून असते, तितकेच किंवा त्यापेक्षाही जास्त ते आपल्या मानसिक स्थितीवरही अवलंबून असते. सतत चिंता, ताणतणाव, स्पर्धा, हेवेदावे, मत्सर, भीती, असुरक्षितता अशा नकारात्मक भावनांचा पगडा आपल्या मानसिकतेवर असेल, तर आपल्या आरोग्यावरही विपरित परिणाम होतात. त्याउलट सकारात्मक मानसिकता आरोग्यावर चांगला परिणाम करते. ही सकारात्मकता प्रयत्नपूर्वक जोपासता येते. त्यासाठी फक्त आपल्या मनाला काही सवयी लावणे गरजेचे आहे. आपला स्वभाव कसाही असला, तरी तो प्रयत्नांनी बदलता येतो आणि सकारात्मकतेचे लाभ मिळवता येतात…

दररोजच्या आयुष्यात आपल्याला अनेक निराशेचे, मानहानीचे प्रसंग, ताण वाढवणार्‍या घटना, दु:खद आठवणी, अपेक्षाभंग अशा अनेक नकारात्मक बाबींचा सामना करावा लागतो. आपल्या मनाची शक्ती कमी करणार्‍या या गोष्टींचा प्रभाव नाहीसा करण्यासाठी सकारात्मक दृष्टिकोनाची गरज असते. कारण, नकारात्मतेचा थेट परिणाम आपल्या मानसिक आणि शारीरिक आरोग्यावरही होत असतो. हे परिणाम टाळून आपल्या मनाला आणि मेंदूला सकारात्मकतेची सवय लावण्यासाठी हे उपाय करून पहा.

कृतज्ञ राहा

👉 आपल्या टेबलवर एक डायरी आणि पेन ठेवा. रोज रात्री झोपण्यापूर्वी त्यात दिवसभरात घडलेल्या अशा किमान तीन गोष्टी लिहा, ज्याबद्दल तुम्हाला कोणाचे तरी आभार मानावेसे वाटतील. कुटुंबीय, नातेवाईक, कर्मचारी, सहकारी किंवा एखादी अनोळखी व्यक्ती यांच्यापैकी कुणीही या कृतज्ञतेचे वाटेकरी होऊ शकतील. या सवयीमुळे आपल्याला आयुष्यातील चांगल्या आणि सकारात्मक गोष्टींकडे जाणीवपूर्वक पाहण्याची सवय लागेल आणि नकारात्मक गोष्टींचा प्रभाव कमी होईल. आपला पेला अर्धा का होईना, पण भरलेला आहे, याबाबत कृतज्ञता ठेवली, तर अर्ध्या रिकाम्या पेल्याबद्दल वाटणारे वैषम्य कमी होते. या सकारात्मकतेने रोजच्या कामांसाठी उत्साह आणि आत्मविश्वास वाढतो.

बॅलन्स्ड राहा

👉 कोणत्याही चांगल्या किंवा वाईट घटनेने भावनांची आंदोलने होण्याचा स्वभाव असेल, तर त्याला आळा घालण्यासाठी समतोल राहण्याची गरज असते. ही सवय आपल्या मनाला लावता येते. योग, मेडिटेशन, दीर्घ श्वसन अशा गोष्टींनी मनाचा समतोल साधता येतो. तुमचे मन शांत करणारी कोणतीही गोष्ट दिवसभरात आवर्जून करा. शांत मनात नेहमी सकारात्मक ऊर्जा निर्माण होते.

कार्यरत राहा

👉 रिकामे मन हे सैतानाचे घर असते, अशी एक म्हण आहे. त्यामुळे आपले मन कोणत्याही कामात गुंतलेले असेल, तर त्यात नकारात्मक विचारांना थारा मिळत नाही. रिकाम्या वेळी आवडीच्या छंदात मन रमवा. काही सर्जनशील उपक्रम राबवा. एखादी कला किंवा कोणतीही नवी गोष्ट शिका. त्यातून सकारात्मक ऊर्जा मिळण्यास मदत होते. नकारात्मक ऊर्जा नुकसानकारक असते, तितकीच सकारात्मक ऊर्जा ही चांगले परिणाम करणारी असते.

क्षमाशील व्हा

👉 इतरांच्या वागणुकीचा अतिविचार करण्यामुळे आपल्या मनात त्यांच्या वागणुकीचे प्रत्युत्तर त्याच पद्धीने देण्याची इच्छा निर्माण होते. ही सूडभावना नकारात्मक ऊर्जा निर्माण करते. त्याउलट ‘फर्गेट अ‍ॅण्ड फरगिव्ह’, म्हणजे ‘विसरून जा आणि क्षमा करा’ ही वृत्ती ठेवली, तर आपल्यातील सकारात्मक कार्यशक्ती सूडभावनेच्या प्रभावामुळे नष्ट होत नाही. योग्य आहार, झोप आणि व्यायाम आपल्या मनाच्या स्थितीवर आपला आहार, विश्रांती यांचा खोलवर परिणाम होत असतो. काही जीवनसत्त्वांच्या कमतरतेमुळे ताणतणाव, तीव्र भीती, भावनिक उद्रेक, नैराश्य, व्यसनाधीनता आणि इतर अनेक मानसिक आजार जडू शकतात. म्हणूनच पुरेसा आणि पोषक आहार सकारात्मतेसाठी आवश्यक आहे. त्याचप्रमाणे पुरेशा विश्रांतीशिवाय मन स्वस्थ आणि निरोगी राहत नाही. अपुरी झोप मिळणार्‍या व्यक्ती चंचल, संतापी, हेकेखोर असतात. म्हणून पुरेशी झोप घ्या. त्याबरोबर भरपूर पाणी प्या.

इतरांना मदत करा

👉 जेव्हा इतरांना तुमच्या मदतीची गरज असते, तेव्हा ती करा. त्यातून मिळणारे समाधान मानसिक ऊर्जेसाठी उत्तम असते.